ଏଣିକି ବିନା ଫିଟନେସ୍ରେ ଗାଡ଼ି ଚଲାଇଲେ କଡ଼ା ଆକ୍ସନ: ଗାଡ଼ି ହେବ ଜବତ, ଗଣିବାକୁ ପଡ଼ିବ ମୋଟା ଅଙ୍କର ଜରିମାନା
ଭୁବନେଶ୍ୱର ୦୫/୦୭ ରାଜ୍ୟରେ ସଡ଼କ ଦୁର୍ଘଟଣା ରୋକିବା ଏବଂ ନିୟମକୁ ଅଧିକ କଡ଼ାକଡ଼ି କରିବା ପାଇଁ ଓଡ଼ିଶା ପରିବହନ ବିଭାଗ (ଓଡିଶା ରାଜ୍ୟ ପରିବହନ ବିଭାଗ ) ଏକ ବଡ଼ ପଦକ୍ଷେପ ଗ୍ରହଣ କରିଛି। ଏଣିକି ବିନା ବୈଧ ଫିଟନେସ୍ ସାର୍ଟିଫିକେଟ୍ ରେ ରାସ୍ତାରେ ଗାଡ଼ି ଚଲାଉଥିବା ଚାଳକଙ୍କ ବିରୋଧରେ ପ୍ରଶାସନ ପକ୍ଷରୁ ଶୂନ୍ୟ ସହନଶୀଳତା ନୀତି ଆପଣାଯିବ। ଧରାପଡ଼ିଲେ କେବଳ ମୋଟା ଅଙ୍କର ଆର୍ଥିକ ଜରିମାନା ଦେବାକୁ ପଡ଼ିବ ନାହିଁ, ବରଂ ଗାଡ଼ିକୁ ମଧ୍ୟ ସ୍ଥଳସୂତ୍ରରେ ଜବତ କରାଯିବ।ପରିବହନ ବିଭାଗର ସୂଚନା ଅନୁଯାୟୀ, ଅନେକ ବ୍ୟବସାୟିକ ଏବଂ ବ୍ୟକ୍ତିଗତ ଗାଡ଼ି ନିର୍ଦ୍ଧାରିତ ସମୟ ସୀମା ପରେ ମଧ୍ୟ ବିନା ଫିଟନେସ୍ ଯାଞ୍ଚରେ ରାସ୍ତାରେ ଚଳାଚଳ କରୁଛନ୍ତି। ଏହା ଦ୍ୱାରା ବଡ଼ ଧରଣର ଦୁର୍ଘଟଣା ଘଟିବାର ଆଶଙ୍କା ରହୁଛି। ଏହାକୁ ଦୃଷ୍ଟିରେ ରଖି ସମସ୍ତ ଆରଟିଓ (ଆର ଟି ଓ ) ଅଧିକାରୀଙ୍କୁ ବିଭିନ୍ନ ସ୍ଥାନରେ ସ୍ପେଶାଲ୍ ଡ୍ରାଇଭ୍ କରି ଗାଡ଼ି ଗୁଡ଼ିକର କଡ଼ା ଚେକିଂ କରିବାକୁ ନିର୍ଦ୍ଦେଶ ଦିଆଯାଇଛି।ବିଶେଷ କରି ମାଲବାହୀ ଟ୍ରକ୍, ବସ୍, ଅଟୋ ଏବଂ ପୁରୁଣା ଚାରିଚକିଆ ଗାଡ଼ି ଉପରେ ତୀକ୍ଷ୍ଣ ନଜର ରଖାଯାଉଛି। ବାରମ୍ବାର ନିୟମ ଉଲ୍ଲଂଘନ କଲେ ଚାଳକଙ୍କ ଡ୍ରାଇଭିଂ ଲାଇସେନ୍ସ (ଡି ଏଲ ) ବାତିଲ କରାଯିବା ସହ ଗାଡ଼ିର ପଞ୍ଜୀକରଣ ମଧ୍ୟ ରଦ୍ଦ କରାଯାଇପାରେ ବୋଲି ଚେତାବନୀ ଦିଆଯାଇଛି। ସୁରକ୍ଷିତ ଯାତ୍ରା ପାଇଁ ସମସ୍ତ ଗାଡ଼ି ମାଲିକ ନିଜ ଗାଡ଼ିର ଫିଟନେସ୍ ଅବଧି ଶେଷ ହେବା ପୂର୍ବରୁ ଏହାକୁ ନବୀକରଣ କରିନେବାକୁ ବିଭାଗ ପକ୍ଷରୁ ଅନୁରୋଧ କରାଯାଇଛି।
ବିରେ ରିପୋର୍ଟ ଶ୍ରୀ ନ୍ୟୁଜ
