ବେଲଗୁଣ୍ଠା ବିଜ୍ଞାପିତ ଅଞ୍ଚଳ ପରିଷଦ (NAC) ଦ୍ୱାରା ବଦ୍ଧିତ ହୋଲଡିଂ ଟାକ୍ସ ପ୍ରତ୍ୟାହାର ଦାବିରେ ବଣିକ ସଂଘର ଶାନ୍ତିପୂର୍ଣ୍ଣ ଧାରଣା
ବେଲଗୁଣ୍ଠା ଶିବରାମ ଚୌଧୁରୀ ୦୮/୦୯:ବେଲଗୁଣ୍ଠା ବିଜ୍ଞାପିତ ଅଞ୍ଚଳ ପରିଷଦ ପକ୍ଷରୁ ଅହେତୁକ ଭାବେ ବୃଦ୍ଧି କରାଯାଇଥିବା ହୋଲଡିଂ ଟାକ୍ସକୁ ବିରୋଧ କରି ଆଜି ବେଲଗୁଣ୍ଠା ବଣିକ ସଂଘ ତରଫରୁ ଏକ ଶାନ୍ତିପୂର୍ଣ୍ଣ ଧାରଣା ଦିଆଯାଇଛି। ସହରର ସମସ୍ତ ବ୍ୟବସାୟୀ ଏବଂ ସ୍ଥାନୀୟ ଜନସାଧାରଣ ଏହି ଆନ୍ଦୋଳନରେ ସାମିଲ ହୋଇ ପ୍ରଶାସନର ଏହି ମନମୁଖୀ ନିଷ୍ପତ୍ତିକୁ ଦୃଢ଼ ନିନ୍ଦା କରିଛନ୍ତି।ସୂଚନାଯୋଗ୍ୟ ଯେ, ବେଲଗୁଣ୍ଠା NAC ପକ୍ଷରୁ ନିକଟରେ ହୋଲଡିଂ ଟାକ୍ସ ପରିମାଣକୁ ଗୁଣାତ୍ମକ ଭାବେ ବୃଦ୍ଧି କରାଯାଇଛି, ଯାହା ସାଧାରଣ ବ୍ୟବସାୟୀ ଓ ଜନସାଧାରଣଙ୍କ ଉପରେ ଅତିରିକ୍ତ ଆର୍ଥିକ ବୋଝ ପକାଉଛି। ଏହି ବଦ୍ଧିତ ଟାକ୍ସକୁ ସମ୍ପୂର୍ଣ୍ଣ ପ୍ରତ୍ୟାହାର କରିବା କିମ୍ବା ଏହାକୁ ପୁନର୍ବିଚାର କରିବା ଦାବିରେ ବଣିକ ସଂଘ ପକ୍ଷରୁ NAC କାର୍ଯ୍ୟାଳୟ ସମ୍ମୁଖରେ ଶାନ୍ତିପୂର୍ଣ୍ଣ ଭାବେ ଧାରଣା ଦିଆଯାଇଥିଲା।
ଅହେତୁକ ଭାବେ ବୃଦ୍ଧି କରାଯାଇଥିବା ହୋଲଡିଂ ଟାକ୍ସକୁ ତୁରନ୍ତ ପ୍ରତ୍ୟାହାର କରାଯାଉ।ବ୍ୟବସାୟୀ ଓ ସ୍ଥାନୀୟ ଅଧିବାସୀଙ୍କ ସହିତ ଆଲୋଚନା କରି ଟାକ୍ସର ପୁନଃ ନିର୍ଦ୍ଧାରଣ କରାଯାଉ।ପୌରସେବା ନାମରେ କେବଳ କର ଆଦାୟ ନକରି ସହରର ମୌଳିକ ସମସ୍ୟାର ସମାଧାନ କରାଯାଉ।
ଧାରଣାରେ ବଣିକ ସଂଘର କର୍ମକର୍ତ୍ତାମାନେ ପ୍ରକାଶ କରିଛନ୍ତି ଯେ, ସାମ୍ପ୍ରତିକ ପରିସ୍ଥିତିରେ ବ୍ୟବସାୟ ମନ୍ଦା ଚାଲିଥିବା ବେଳେ ପ୍ରଶାସନର ଏହିଭଳି ନିଷ୍ପତ୍ତି ବ୍ୟବସାୟୀଙ୍କ ମେରୁଦଣ୍ଡ ଭାଙ୍ଗିଦେଇଛି। ଯଦି ପ୍ରଶାସନ ଶୀଘ୍ର ଏହି ବଦ୍ଧିତ ଟାକ୍ସ ନିଷ୍ପତ୍ତି ପ୍ରତ୍ୟାହାର ନକରେ, ତେବେ ଆଗାମୀ ଦିନରେ ବେଲଗୁଣ୍ଠା ସହର ସମ୍ପୂର୍ଣ୍ଣ ବନ୍ଦ କରିବା ସହ ଆନ୍ଦୋଳନକୁ ଆହୁରି ବ୍ୟାପକ କରାଯିବ ବୋଲି ବଣିକ ସଂଘ ପକ୍ଷରୁ ଚେତାବନୀ ଦିଆଯାଇଛି।
ଆନ୍ଦୋଳନ ସ୍ଥଳରେ ବଣିକ ସଂଘର ସଭାପତି, ସମ୍ପାଦକଙ୍କ ସମେତ ବହୁ ବିଶିଷ୍ଟ ବ୍ୟବସାୟୀ ଓ ନାଗରିକ ସମାଜର ପ୍ରତିନିଧିମାନେ ଉପସ୍ଥିତ ଥିଲେ। ଏହି ଶାନ୍ତିପୂର୍ଣ୍ଣ ଧାରଣା ପରେ NAC କାର୍ଯ୍ୟନିର୍ବାହୀ ଅଧିକାରୀଙ୍କୁ ଏକ ଦାବିପତ୍ର ପ୍ରଦାନ କରାଯାଇଛି।
