ମହାରାଷ୍ଟ୍ରରେ ୨୦୦ ବର୍ଷ ପରେ ଘରକୁ ଆସିଲା ‘ଲକ୍ଷ୍ମୀ’: ଝିଅ ଜନ୍ମର ଖୁସିରେ ହେଲିକପ୍ଟରରେ ଆସିଲେ ନବଜାତ ଓ ମା’
ବିଶେଷ ପ୍ରତିନିଧି / ମହାରାଷ୍ଟ୍ର:
ପୁଅ-ଝିଅ ମଧ୍ୟରେ ଭେଦଭାବ ଦୂର କରି ସମାଜକୁ ଏକ ନୂଆ ଦିଗଦର୍ଶନ ଦେଇଛି ମହାରାଷ୍ଟ୍ରର ଏକ ଗ୍ରାମ। ଦୀର୍ଘ ୨୦୦ ବର୍ଷର ଆଶା ଓ ପ୍ରତୀକ୍ଷା ପରେ ଘରକୁ ଆସିଛି ଝିଅ ଜନ୍ମର ଖୁସିଖବର। ପରିବାରରେ କନ୍ୟାରତ୍ନଟିଏ ଜନ୍ମ ହେବା ପରେ ଏହି ଆନନ୍ଦକୁ ସ୍ମରଣୀୟ କରିବା ପାଇଁ ପରିବାର ଲୋକେ ନବଜାତ ଶିଶୁ ଏବଂ ତାଙ୍କ ମା’ଙ୍କୁ ହେଲିକପ୍ଟର ଯୋଗେ ଘରକୁ ଆଣି ଏକ ନିଆରା ଉଦାହରଣ ସୃଷ୍ଟି କରିଛନ୍ତି।ମିଳିଥିବା ସୂଚନା ଅନୁସାରେ, ଏହି ପରିବାରରେ ଗତ ୨ ଶହ ବର୍ଷ ଧରି କୌଣସି ଝିଅ ଜନ୍ମ ହୋଇନଥିଲେ। ପରିବାରରେ କେବଳ ପୁଅମାନେ ହିଁ ଜନ୍ମ ନେଉଥିଲେ। ତେବେ ଦୀର୍ଘ ଦୁଇ ଶତାବ୍ଦୀ ପରେ ଘରକୁ କନ୍ୟାରତ୍ନ ଆସିବା ପରେ ପରିବାର ଲୋକଙ୍କ ଖୁସି କହିଲେ ନସରେ। କନ୍ୟା ସନ୍ତାନଟିକୁ ସାକ୍ଷାତ୍ ‘ଲକ୍ଷ୍ମୀ’ର ରୂପ ମାନି ପରିବାର ପକ୍ଷରୁ ଗାଁରେ ଏକ ଉତ୍ସବର ମାହୋଲ ସୃଷ୍ଟି କରାଯାଇଥିଲା। ହସ୍ପିଟାଲରୁ ଡିସଚାର୍ଜ ହେବା ପରେ ନବଜାତ ଶିଶୁ ଓ ତାଙ୍କ ମା’ଙ୍କୁ ଆଣିବା ପାଇଁ ସ୍ୱଶରୀରେ ହେଲିକପ୍ଟର ବୁକ୍ କରାଯାଇଥିଲା। ଗାଁରେ ହେଲିକପ୍ଟର ଓହ୍ଲାଇବା କ୍ଷଣି ଗ୍ରାମବାସୀ ଓ ପରିବାର ଲୋକେ ଫୁଲ ବର୍ଷା କରିବା ସହ ବାଜା-ରୋଶନି ଓ ସାହାନାଇ ବଜାଇ ନବଜାତକୁ ସ୍ୱାଗତ କରିଥିଲେ। ସମ୍ପୂର୍ଣ୍ଣ ଗାଁକୁ ରଙ୍ଗୋଲି ଓ ଆଲୋକମାଳାରେ ସଜାଯାଇଥିଲା। ନବଜାତ ଶିଶୁର ବାପା ଓ ପରିବାରର ବରିଷ୍ଠ ସଦସ୍ୟମାନେ କହିଛନ୍ତି,”ଆମ ପରିବାରରେ ୨୦୦ ବର୍ଷ ହେବ କୌଣସି ଭଉଣୀ କିମ୍ବା ଝିଅ ନଥିଲେ। ଆମେ ବହୁତ ବର୍ଷରୁ ଏହି ଦିନକୁ ଅପେକ୍ଷା କରିଥିଲୁ। ଆମ ଘରକୁ ଆଜି ସାକ୍ଷାତ୍ ଲକ୍ଷ୍ମୀ ଆସିଛନ୍ତି, ତେଣୁ ଏହି ଖୁସିକୁ ଆମେ କୌଣସି ଗୁଣରେ କମ୍ କରିବାକୁ ଚାହୁଁନଥିଲୁ।” ଯେଉଁ ସମୟରେ କିଛି ସ୍ଥାନରେ କନ୍ୟା ଭ୍ରୂଣହତ୍ୟା ଭଳି କୁପ୍ରଥା ଦେଖିବାକୁ ମିଳୁଛି, ସେହି ସମୟରେ ଝିଅ ଜନ୍ମକୁ ନେଇ ଏପରି ଭବ୍ୟ ଉତ୍ସବ ପାଳନ କରିବା ସମାଜ ପାଇଁ ଏକ ସ୍ୱାଗତଯୋଗ୍ୟ ଓ ପ୍ରେରଣାଦାୟୀ ପଦକ୍ଷେପ। ଏହି ଘଟଣାଟି ଏବେ ସୋସିଆଲ ମିଡିଆରେ ଚର୍ଚ୍ଚାର ବିଷୟ ପାଲଟିଥିବା ବେଳେ ସବୁଆଡ଼ୁ ପରିବାରକୁ ପ୍ରଶଂସାର ସ୍ରୋତ ଛୁଟୁଛି।
